Աուտոիմուն հիվանդություններ. armeniamedicalcenter.am

Աուտոիմուն հիվանդությունները իմունային համակարգի գործունեության խանգարման հետևանք են: Ախտաբանության հիմքում իմունիտետի չափազանց մեծ ակտիվությունն է, որը օրգանիզմի բջիջներն ընդունում է որպես օտար և սկսում է ոչնչացնել դրանք: Այս շարքի հիվանդությունները բուժման չեն ենթարկվում, այդ պատճառով պահանջվում է մշտական պահպանողական թերապիա: Դրանք հանդիպում են բոլոր տարիքներում, հավասարապես և՛ կանանց, և՛ տղամարդկանց մոտ:

Իմունային համակարգի խանգարումը բերում է հաշմանդամության, երբեմն անգամ մահվան աշխատունակ տարիքում:

Ռիսկի խմբում են.

• Վերարտադրողական տարիքի կանայք
• Գենետիկ նախատրամադրվածությամբ մարդիկ
• Մշտական նեգատիվ ազդեցության ենթարկվողները
• Որոշակի հիվանդություններ ավելի հաճախ հանդիպում են որոշակի ռասայի ներկայացուցիչների մոտ. եվրոպացիների մոտ ավելի շատ դիտվում է մեկ տիպի շաքարային դիաբետը, նեգրոիդների մոտ՝ կարմիր գայլախտը

 
Իմունային համակարգի խանգարման տեսակները

Բաժանվում են երկու խմբի՝ տեղային /ախտահարվում են առանձին օրգաններ և հյուսվածքներ/ և համակարգային /ախտահարվում է ողջ օրգանիզմը/:

Ըստ օրգան-համակարգերի ախտահարման տարբերում են.
 

• Էնդոկրին
• Հոդային
• ԿՆՍ
• Ստամոքս-աղիքային
• Լյարդի
• Անոթների և արյունաստեղծ օրգանների
• Միզասեռական
• Շնչառական և սիրտ-անոթային
• Մաշկային

 
Ավելի տարածված աուտոիմուն հիվանդություններ

Կրոնի հիվանդություն

Աղիների քրոնիկ հիվանդություն է: Ուղեկցվում է դիարեայով, ցավային զգացողությամբ, հյուծվածությամբ: Երբեմն աղիներում առաջանում են խուղակներ, նեղացումներ: Նշանակվում է հատուկ թերապիա և սննդակարգ:

Սկլերոդերմիա

Ախտահարում է մաշկային ծածկույթները և օրգանիզմի բոլոր հյուսվածքները: Պատճառը արատավոր կոլլագենի չափից ավելի արտադրությունն է: Արդյունքում մաշկը դառնում է շատ կոշտ: Սպիտակուցի ավելցուկը կուտակվում է տարբեր օրգաններում՝ բերելով նրանց գործունեության խանգարման: Օրինակ, կարող է առաջանալ թոքերի ֆիբրոզ կամ թոքային հիպերտենզիա:

Առաջին տիպի շաքարային դիաբետ

Այս դեպքում իմունային համակարգի գրոհին ենթարկվում են ինսուլին արտադրող բջիջները: Ինսուլինի քանակի նվազման հետևանքով արյան մեջ բարձրանում է շաքարի քանականությունը: Տուժում են երիկամները, նյարդային համակարգը, տեսողությունը: Նշանակվում են հատուկ պատրաստուկներ (պրեպարատներ) օրգանիզմի գործունեությունը կարգավորելու համար:

Ցրված սկլերոզ

Այս դեպքում տուժում են ողնուղեղի և գլխուղեղի նյարդային բջիջները, հիվանդության սկզբում զգացվում է միայն թեթև հոգնածություն, բայց աստիճանաբար ի հայտ են գալիս
նոր ախտանշաններ: Չնայած նշանակումներին, հիվանդությունը բուժման չի ենթարկվում: Սակայն սթրեսներից, ինֆեկցիաներից խուսափելը օգնում է լավացնելու կյանքի որակը:

Ռևմատոիդ արթրիտ

Ռևմատոիդ արթրիտի ժամանակ իմունային գրոհն ուղղված է հոդերի դեմ: Դիտվում են հոդացավեր, կարկամություն, հոդերի ձևախեղում (դեֆորմացիա): Երբեմն պահանջվում է վիրաբուժական միջամտություն: Կարող են լինել նաև այլ օրգանների ախտահարումներ:

Կարմիր գայլախտ

Վտանգավոր հիվանդություն է, ախտահարում է օրգանիզմի բոլոր հյուսվածքները: Առանց համապատասխան բուժման կարող է մահվան ելքով ավարտվել: Իսկ բուժումը միայն
նվազեցնում է բջիջների վրա հիվանդության բացասական ազդեցությունը: Հաճախ քթի և այտերի շրջանում առաջանում է ցան  թիթեռնիկի նման:

Փսորիազ

Բնորոշվում է մաշկի պաթոլոգիկ աճով, որի հետևանքով առաջանում են էպիդերմիսի կեղևակալված մասնիկներով պատված սպիտակ բծեր: Արտահայտվում է քորով, ցավային զգացողությամբ: Բուժումը ժամանակին չանցկացնելու դեպքում ախտաբանությունը տարածվում է ներքին օրգանների վրա:

Վասկուլիտ

Ամենավտանգավոր ախտաբանություններից է, երբ վնասվում են արյունատար անոթները: Անոթների պատերը բարակում են, աստիճանաբար քայքայվում են ներքին օրգանները:

Արդյունավետ թերապիան բացակայում է:

Հեմոլիտիկ անեմիա

Այս ախտաբանության ժամանակ լեյկոցիտները քայքայում են էրիթրոցիտները, ինչը բերում է օրգանիզմի ընդհանուր թուլացման:

Միասթենիա

Բացասական ազդեցության է ենթարկվում մկանային համակարգը: Բուժառուն արագ է հոգնում: Կանոնավոր բուժման արդյունքում կարելի է բարձրացնել մկանային տոնուսը,
վերադարձնել օրգանիզմի նորմալ վիճակը:

Բուժական մոտեցումները.

• Դեղորայքի ընդունում: Սա բուժման հիմնական միջոցն է, որով հնարավորինս նվազեցվում է իմունային համակարգի ակտիվությունը:
• Ֆիզիոթերապիա – նշանակվում է ռեմիսիայի շրջանում, օգնում է ամրացնելու հոդերը, անոթները, մկանային համակարգը:
• Բուժական մարմնամարզություն – ամրացնում է մկանները, հոդերը:
• Վիրահատական միջամտություն։

Հարցեր, պատասխաններ, մեկնաբանություններ